NGABADLALI be-Asande FC okubuyiselwe enkundleni umdlalo wayo omiswe ngunondweba ngenxa yezizathu zokuphepha kwakhe.

Mfanafuthi Ndlovu

INIKWE ithuba lokuvika izembe i-Asande FC egijima kwiSafa KZN ABC Motsepe League ngesikhathi ikomiti eliqondisa ubugwegwe libuyisela umdlalo wayo ensimini.

Umdlalo obuphakathi kwe-Asande neDurban Pioneers emasontweni amabili edlule kawuphelanga emuva kokuba unondweba ewumisile ngenxa yovalo ngokuphepha kwakhe. Umiswe zibambene ngo-0-0.

Ikomiti leSafa eliqondisa ubugwegwe linqume ukuba lo mdlalo ubuyele ensimini,  usuzokuba ngoMgqibelo ngo-11h00 eKing Zwelithini Stadium, eMlazi.

YI-DURBAN Pioneers ephethe ukhiye wezembe elilengela i-Asande FC.

Lo mdlalo unika i-Asande ithuba lokuvika izembe njengoba isempini neMuzi King Masters emincele ukuhlala kulesi sigaba.

Uma i-Asande izimisele ngokuvika izembe, kumele inqobe kumnyama kubomvu kwiPioneers njengoba isemsileni ngamaphuzu awu-16 emidlalweni ewu-17, kanti iMuzi inawu-17 emidlalweni ewu-18.

Ukudlala ngokulingana kwe-Asande ngeke kuyisize njengoba ingenelwe ngamagoli amaningi uma kuqhathaniswa nangenele iMuzi. Ishaye awu-13, yona yangenelwa ngawu-27 (-14) kanti iMuzi inawu-14, yangenelwa ngawu-20 (-6).

Lo mdlalo we-Asande nePioneers uzobe usulandelwa ngowe-provincial play-offs phakathi koMkhambathi neMidlands Wanderers ngo-15h00.

Ozonqoba uzomela isifundazwe kweyama-play off kazwelonke azokuba se-Free State mhla ka-16 kuya ku-22 kuJune.