02. Ezifingqiwe

KUBUYE ithemba lokuthi kungenzeka iSouth African Reserve Bank, iyicabange eyokwehlisa izinga lenzalo yemalimboleko ngemuva kokuvela kwezindaba ezithi lehle lafinyelela ku-2.7% izinga lokwehla kwamandla emali (inflation).

Kumangaze ngisho osomnotho kuleli sonto iStats SA ibika ukuthi ngoNdasa (March) izinga lokwehla kwamandla emali lehle lafika ku-2.7%, lisuka ku-3.2% ngoNhlolanja (February).
Ukwehla kwentengo kaphethiloli, ukulungiswa kwezinselelo zengqalasizinda, nokwehla kwentengo kawoyela ongahluziwe emhlabeni, ngezinye zezinto okuthiwa zibe nomthelela ekwehleni kwezinga lokwehla kwamandla emali.
Kusale kancane izinga le-inflation lifinyelele kuleli langaphambi kokubheduka kweCovid-19, elaliwu-2.2%

OWAYENGUMENGAMELI wezwe uMnu Jacob Zuma uphinde wachithwa yiNkantolo eNkulu yaseMgungundlovu.

UMsholozi ubefake isicelo sokuba kuchithwe ukwenqatshelwa kwesicelo sakhe sokuba ahoxiswe uMshushisi u-Adv Billy Downer, ecaleni lenkohlakalo uZuma abhekene nalo.

UZuma ukholwa wukuthi uDowner uzokwephula ilungelo lakhe lokushushiswa ngendlela enobulungiswa.

IJaji uMnu Nkosinathi Chili, okuyilo elachitha isicelo sikaZuma nyakenye, ngoLwesine likhiphe isinqumo esithi kaliboni ukuthi enye inkantolo ingasivumela isicelo.

Ummeli KaZuma, uMnu Dali Mpofu uthi bazoya eNkantolo eNkulu yokuBuyekezwa kwamaCala ukuyophonsela inselelo isinqumo sikaChili.

KUPHOQELEKE ukuba alunqamule uhambo lwakhe lwaseNingizimu Afrika uMengameli wase-Ukraine, uMnu Volodymyr Zelenskyy kulandela ukuhlaselwa kwezwe lakhe ngoLwesithathu ebusuku.

UZelenskyy uqhubekile nokusola iRussia nokuqhubeka ngokuhlasela izwe lakhe, nakuba ethi uzivulile izingxoxo zokuthi kwakheke ukuthula phakathi kwala mazwe.

UZelenskky ubambe umhlangano omfushane noMnu Ramaphosa, waveza intshisekelo yokuthi i-Ukraine neNingizimu Afrika bakhe ubudlelwano bokuhwebelana.

Ushiye ongqongqoshe bakhe ukuba baqhubeke nezingxoxo zokwakha nokuqinisa amaxhama obudlelwano njengoba yena kuphoqeleke ukuba abuyele e-Ukraine, ukuyobhekana nalesi simo esiphuthumayo.

KUBE nomdonsiswano wamaqembu ezepolitiki, ezigqaja ngokumela abantu baseNingizimu Afrika kulandela isimemezelo sikaNgqongqoshe wezeMali sokuhoxisa ukunyuswa kweVAT.

NgoLwesine ekuseni abantu baseNingizimu Afrika bavuke nezindaba zokuthi ngeke isanyuswa iVAT, njengoba bekulindeleke ukuba inyuke ngomhla ka-1 kuNhlaba (May) 2025.

Ngemuva kwalesi sinqumo, amaqembu ezepolitiki azishaye izifuba ngokuthi kube wukumela kwawo abantu baseNingizimu Afrika ngokuthi lokhu kungenzeki, njengoba bekuzoba wumthwalo emahlombe abo.

IDA yona izishaye isifuba njengoba ithi ukuhoxiswa kokunyuswa kweVAT kwenzeke ngenxa yayo, njengoba udaba ilufake enkantolo.

Leli qembu lithe ungqongqoshe ubonile ukuthi ngeke alibone elidlalalayo enkantolo, wabe esehoxisa isinqumo njengoba bekulindeleke ukuba siphume maduze.