Izindaba | 08
Friday, 04 April 2025
Bancele kogwansile osomabhizinisi kwiKwaMashu Business Fair
Lo mbukiso uzovezwa kumabonakude namuhla
KWESOBUNXELE nguNkz Lindelwa Mbulawa noNkz Amanda Ngobese bekhangisa ngemikhiqizo yabo ye-Indalo Enhle Herbs & Beyond. Bangabanye bosomabhizinisi abebehambele lo mbukiso.
ISITHOMBE : SITHUNYELWE
Mpume Sibiya
BAZOTHOLA ithuba lokwetshisa konke obekwenzeka embukisweni wosomabhizinisi, iKwaMashu Business Fair, obuseBridge City Mall, KwaMashu - odonse izinsuku ezintathu ngeledlule - abanentshisekelo kwezamabhizinisi njengoba uzosakazwa namuhla ngoLwesihlanu ngo-20h30 kwi-1KZNTV nakwiDStv Channel 261.
Babalelwa ku-9 000 osomabhizinisi - kubalwa nabancane - abadele imvula, njengoba beliyidliva ngosuku lokuqala, bayothamela lo mbukiso.
Inhloso yokusungulwa kwalo mbukiso wukunika bonke osomabhizinisi abasathuthuka, abakhele i-INK (Inanda, iNtuzuma neKwaMashu), ithuba lokukhangisa ngemisebenzi yabo, nangokucotshelelwa ngolwazi yilabo asebekhulile kulo mkhakha.
UMnu Thembo Ntuli oyikhansela eThekwini, futhi ongusihlalo wekomidi eliqondene nezokuthuthukiswa komnotho kulo masipala, ubonge abaxhasi balo mbukiso wathi bazama izindlela zokusondeza osomabhizinisi abancane, babaxhase nabo babe yingxenye yokuthuthukisa umnotho.
UVANESSA Marawa ongumsakazi weVuma FM (ophethe umbhobho), ubebuka konke okwenzekayo ngesikhathi uChef Zinhle Mabhida okwesobunxele noChef Sne Moloi bematasa emabhodweni ngezidlo eziconsisa amathe.
ISITHOMBE NGU: MPUME SIBIYA
Okuqaphelekile kube wukuxhumana okuhle phakathi kosomabhizinisi. Bebevakashelana ematendeni abebekhangisa kuwona imikhiqizo namabhizinisi abo, kanti neziteshi zemisakazo ezahlukene bezisakaza bukhoma.
Baningi abathole ithuba lokuxoxa ngamabhizinisi abo kule misakazo, nokuxhumana nabanye osomabhizinisi.
I-KwaMashu Business Fair ibihanjelwe nangosaziwayo abehlukene, okubalwa kubo nabalingisi.
USimphiwe Majozi odlala indawo kaSbu emdlalweni Uzalo, naye ubekhona.
Isigatshana iFlavours of Durban, besethulwa ngabantu abehlukene, okubalwa kubona uVanessa Marawa ongumsakazi weVuma FM noTha Simelane ongunontandakubukwa weTheku.
UThinah Zungu nendodana yakhe, uNdumiso - abacula i-gospel - bebenandisa. Bekunabapheki abehlukene kulezi zinsuku ezintathu, kubalwa uChef Sne Moloi obebambisene noChef Zinhle Mabhida, abebetshengisa ngezinhlobo ezahlukene zokudla okuconsisa amathe.
Osomabhizinisi abehlukene abakhulume neLANGA Lempelasonto, bebevumelana ngokuthi le mibukiso iyabasiza kakhulu ekubavuleleni amathuba okwaziwa, wukuxhumana nabanye ozakwabo kulo mkhakha nokuthi bakhangise ngemikhiqizo yabo.
sibiyam@ilanganews.co.za