NGUMFUNDO Manci ogwetshelwe ukulutha abantu ukufaka imali ebhanoyini lakhe.

Intatheli yeLANGA

INHLANZI ishelwe ngamanzi kuMfundo Manci (33), owaphenduka isiqumama "ngemali yezinyembezi", emuva kokuba iNkantolo yezeMali eThekwini imgwebe iminyaka ewu-15 kuleli sonto.

Ulengiselwe ewu-5 - angatholakali enecala lokukhwabanisa nokweba kulesi sikhathi - kanti ewu-10 uzoyibhadla ejele.

UMfundo wayenenkampani eyibhanoyi, iCrypto Mzansi Group (PTY) Ltd, okwacwila kuyo izizumbulu zemali yabantu ababeyitshale kuyona.

Wayehweba ngezobuchwepheshe besimanje, ethembisa abantu ukuthi uma betshala imali kuleli bhanoyi lakhe, bazothola inzalo emangalisayo.

Ngokuhamba kwesikhathi, wabanjwa emuva kokuba abantu bemvulele amacala, kwazise babengasayitholi imali yabo nale nzuzo - econsisa amathe - ababethenjiswe yona.

Ugwetshwe emuva kokuvuma icala ngokuka-Section 105, kumanje uyadonsa ejele iWestville,  eThekwini.

Uvume amacala okukhwabanisa, ukwephula umthetho iBanks Act, wukwephula umthetho weFinancial Advisory and Intermediary Service nePrevention of Organised Crime Act, awenza phakathi kukaJune 2020 no-April 2021.

Kubikwa ukuthi uManci wavula iCrypto Mzansi Group (PTY) Ltd, waqasha abesifazane ababili ayebazi, wabaqeqesha kwezohwebo. Wabatshela ukuthi ufuna ukukhulisa ibhizinisi lakhe futhi uma bethola amakhasimende, bazothola inkokhelo.

Emuva kokuvula le nkampani yakhe, wavula ama-akhawunti emabhange ehlukene.
Laba besifazane ababili ababeqashiwe - kodwa  bengazi ngobugebengu bukaManci - bajoyinisa abanye abantu.

UMfundo wanxenxa abanye abatshalimali ababexhumana naye ngqo ukuba nabo bagibele kuleli bhanoyi.

Ngokusho kweNational Prosecuting Authority (NPA), abanye ababefake imali bayithola inkokhelo ihambisana nenzalo, kodwa kwakuyimali yabanye abantu abajoyinile.

Enkantolo kuvele ukuthi uManci wayengayi-tshali imali, kodwa wayezihwebela yena.
Kunesikhathi anyamalala ngaso, umndeni wakhe nabatshalimali bengasamtholi ocingweni, kwatholakala ukuthi wayeseCape Town.
Ngesikhathi engatholakali, umndeni wakhe wabika emaphoyiseni ukuthi unyamalele kanti wayedla le mali yabantu, okwaphetha ngokuthi bavule amacala.

Ngo-August 2022, uphiko lwe-NPA oludla impahla, i-Asset Forfeiture Unit (AFU), lwathola incwadi egunyaza ukumiswa kokusebenza kwama-akhawunti kaManci emabhange.

Kwathi uma esephelelwe yimali, futhi esebona ukuthi ama-akhawunti akhe amisiwe ukusebenza, wazinikela emaphoyiseni eCape Town, icala ladluliselwa eThekwini.
I-AFU ithathe ukheshi ka-R4.5 million kuManci.

Okhulumela iNPA KwaZulu-Natal, uNkk Natasha Ramkisson-Kara, uthe bayakwemukela ukuphothulwa kwaleli cala ngempumelelo.

Uthe bahalalisela ithimba labashushisi nabaphenyi ngomsebenzi omuhle abawenzile, oholele ekutheni uMfundo abanjwe futhi ajeze ngezenzo zakhe.