Osomabhizinisi banethemba lokuhlomula ngomzila omusha wendiza ophakathi kweKZN neBotswana

Lucky Cain
ebika eseBotswana

OSOMABHIZINISI abasemkhakheni wezo-kuvakasha KwaZulu-Natal, banethemba lokuhlomula ngomzila omusha wendiza ehambela phakathi kweGaborone, eBotswana, naseThekwini, eyethulwe ngoDisemba wonyaka owedlule.
Le ndiza yenkampani i-Air Botswana, ingeyokuqala ukuhambela phakathi kwala madolobha, kanti iqale ukusebenza ngokusemthethweni kuwo uDisemba nyakenye.

Lab' osomabhizinisi baKwaZulu-Natal, abasemkhakheni wezokuvakasha, bathole ithuba eliyingqayizivele lokuba yingxenye yohambo oluhlanganiswe yiKZN Tourism And Film Authority, Durban Tourism ne-Air Botswana oluya eBotswana, obeluhlelelwe ukuqinisa amaxhama okusebenzisana kulo mkhakha.

Labo somabhizinisi ababalelwa ku-10, bathole ithuba lokuzibonela izindawo zokuvakasha ezahlukene, nokuthi bangase-benzisana kanjani nabasembonini yezokuva-kasha abaseBotswana. Bahambele izindawo ezahlukene, okubalwa kuzona amahhotela aseGaborone; yisiqiwi iCresta Mowana Safari and Spa, eKasane, nezinye izindawo. Kulolu hambo, lab' osomabhizinisi batshelwe ngezindawo eziheha izivakashi eBotswana.

NabaseBotswana abasemkhakheni wezoku-vakasha, nabo balitholile ithuba lokuchitha izinsuku eThekwini nakwezinye izindawo  zesifundazwe ngenhloso yokuba nabo banxenxe izivakashi zasezweni labo ukuba zivakashele kulesi sifundazwe, besebenzisa yona le ndiza ehamba kathathu ngesonto.

Isikhulu esiphezulu sale ndiza, uNkz Lulu Rasebotsa, sithe ukuqhamuka nombono  wokuvula lo mzila akubanga yinto enzima ngenxa yokuthi kuningi okuhlanganisa abantu baseBotswana neKwaZulu-Natal.
"Iningi labantu abangomacaphuna kusale eBotswana izingane zabo zifunda ezikoleni eziphezulu zaKwaZulu-Natal. Lokho  kwenze umqondo ukuthi senze ukuhamba nokuva-kashela izingane zabo kube lula," esho.

Uthe okunye okugqugquzele ukuvulwa kwalo mzila, kube wukuqinisa amaxhama okusebenzisana, ikakhulukazi emkhakheni wezokuvakasha njengoba iBotswana igabe  ngawo. Ezokuvakasha eBotswana zidlala indima emqoka njengoba zilele isibili ekukhuphuleni umnotho waleliya lizwe, ngemuva kwezimayini okuyizona ezihamba phambili.

UNkz Rasebotsa uthe ukuqinisa ubudlelwa-no bezokuvakasha kweKwaZulu-Natal neBotswana kuzokwenza le ndiza ihlale imatasa.
"Njengoba iBotswana iyizwe elizungezwe ngamazwe, kasinalo ulwandle, ngakho uma abantu bethu bezimisele ngokuvakashela indawo enolwandle nokunye ngendlela elula, kuzokwenza ubudlelwano buqine. Nabantu baKwaZulu-Natal uma befuna ukuzobona okwehlukile ngeBotswana, bazokwazi," esho.

Uthi kuningi okungajwayelekile abaheha ngakho izivakashi eBotswana. Ubale izindlovu njengezilwane ezithe chithi saka, ikakhulukazi endaweni yaseKasane,  okuyi-dolobha eseliphenduke elokuheha izivakashi. 

UNkk Phetheni Mbonambi (osesithombeni esingenhla), oyisikhulu senkampani iSyavaya Tours, uthe kuyamthokozisa ukuba khona kwale ndiza njengoba eseyibonile indlela angathuthuka ngayo ngokuba khona kwayo.
"Kuzongisiza kakhulu emakhasimendeni ami, ikakhulukazi aqhamuka phesheya kwezilwandle ngoba sengizokwazi ukuthi ngingagcini ngokuwavakashisa ezindaweni zakuleli kuphela, kodwa sekuzoba lula nokuwadlulisela eBotswana ngendlela elula neshehayo," kusho uNkk Mbonambi.

UMnu Bongani Shangase wenkampani iTravel For Change Tours, (osesithombeni esingenhla), uthe ukubakhona kwale ndiza kuzomsiza ukuthuthukisa ibhizinisi lakhe. Uthe okuseqhulwini kuyena wukwakha ubudlelwano bokuthi kube yinkampani yakhe esebenzisana nale ndiza uma kumele ithuthe amakhasimende nezisebenzi zayo ngaso sonke isikhathi uma befika eThekwini. Iningi losomabhizinisi bezokuvakasha lizwakalise injabulo nethemba lokuthi azoqhubeka nokwanda amabhanoyi aqhamuka kwamanye amazwe atheleka esikhumulweni sezindiza eThekwini.

ILANGA Lempelasonto lithole ukuthi emuva kokubheduka kweCovid-19, abebalelwa ku-12 amabhanoyi aqhamuka kwamanye amazwe abetheleka eThekwini, kanti ngesikhathi salolu bhubhane maningi ahoxa. Kuvele ukuthi aseyisikhombisa akhona manje, kanti izingxoxo ziyaqhubeka zokuthi kubuyiswe lawo ahoxa futhi kufike namasha.