NGAPHANDLE KWENKUNDLA        MZWAMANDLA ZONDI

UBONGA iBongumusa Training Run neSalga Games ngokumvulela amathuba kwezokugiji-ma uLindelani Mjwara waseMpendle, kodwa ozalelwe eKilimon, e-Underberg yodumo lwe-Harry Gwala Summer Cup - okuwumjaho wa-mahhashi wasemakhaya.

UMjwara ungomunye wabasubathi abasema-theni kulezi zinsuku njengoba engomunye wa-babuye nendondo yesiliva kwiSouth Africa Marathon Championships ebisemasontweni amabili edlule eCape Town.

Ngenxa yokwenza kahle eCape Town, uhlabane ngethuba elifiswa ngabagijimi abaningi loku-thola inkontileka ngaphansi kwekilabhu yakhe, iHollywood Athletics Club, okungenye yamaki-labhu akhula ngesikhulu isivinini kwezokugiji-ma eNingizimu Afrika.

UMjwara uzalwa mhla ka-23 kuDecember ngo-1996. Uqede u-matric ngo-2018 eChibelihle Combined school eMpendle. Ngemuva koku-phuthula u-matric, uqhubekile nokugijima.

Uthi ngesikhathi eyingxenye yeBongumusa Mthembu Training (60km), uchaze uProdigal Khumalo we-Orcas Academy.
Uthi uKhumalo umthathile wamfaka kwi-aca-demy yakhe ezinze eNanda, kusuka ngo-2020 kuya ku-2024. Nyakenye uthathwe yiHollywood AC njengoba manje esejoyine e-Elite Team yale kilabhu.

Ingxoxo kaMjwara neLANGA Lempelasonto (I/L) ngempilo yakhe yaNgaphandle KweNkundla ihambe ngalolu hlobo:
I/L Ungumuntu onjani?
Mjwara: Ophansi, ohloniphayo futhi obazisayo abanye abantu.
I/L Ukhulele ekhaya elinjani?
Mjwara: Isimo besisibi, namanje kasikabi sihle. Sikhuliswe yimali kagogo yempesheni. Ngiyathandaza ukuba iNkosi ingiphe amandla ngikwazi ukushintsha isimo sasekhaya.
I/L: Uzizwe kanjani ujoyina iHollywood AC Elite Team?
Mjwara: Ngijabule kakhulu ukuba yingxenye yabagijimi okubalwa kubona uGerda Steyn noStephen Mokoka. Ngizosebenza kanzima ukufika ezingeni labo.
I/L: Basaphila abazali?
Mjwara: Umama kuphela osaphila, kanginalo ulwazi ngobaba ngoba wahamba ekhaya ngisemncane, kangikaze ngizwe lutho ngaye.
I/L: Uyakholwa.
Mjwara: Yebo, ngiliNazaretha.
I/L: Unayo ingane?
Mjwara: Kangikabi nayo.
I/L: Ngaphandle kokugijima, ukhona omunye umdlalo owuthandayo?
Mjwara: Ngikhule ngidlala ibhola, kodwa manje uma ngingagijimi ngiye ngidlale amabhayisikili.

I/L: Yiyiphi ikilabhu oyilandelayo eNingizimu Afrika?
Mjwara: NgiyiKhosi for Life (Kaizer Chiefs).
I/L: Uthanda itiye noma ikhofi?
Mjwara: Itiye.
I/L: Yiliphi izwe ofisa ukulivakashela?
Mjwara: YiFrance. Ngithanda idolobha lakhona, iParis.
I/L: Ukhonze hloboluni lokudla?
Mjwara: Ngithanda okunemifino.
I/L: Imoto ofisa ukuhamba ngayo?
Mjwara: Noma yiyiphi ephakeme.
I/L: Uhlelo lukamabonakude olukhonzile?
Mjwara: Uzalo, kanti abalingisi engabakhonzile nguNkunzi odlalwa nguMasoja Msiza noSbu odlalwa nguSimphiwe Majozi.
I/L: Umbala owuthandayo?
Mjwara: Omnyama.
I/L: Imalini enkulu oseke wayiwina kulo mdlalo?
Mjwara: Wu-R8 000 kwiKaapsehoop Marathon, lapho ngenze khona i-personal best (PB) kwi-marathon (2:18). Uma kukhona okuncane engikutholayo, ngikuhambisa ekhaya.

I/L: Hloboluni lomculo oluthandayo?
Mjwara: Umaskandi. Ngike ngacula ngesikhathi se-lockdown, kodwa kangikwazanga ukuqhubeka ngenxa yokuntula imali yoku-recorder. Uma ngingathola ithuba ngingaqhubeka. Abaculi engibathandayo nguMtshengiseni (ongasekho) noKhuzani.
I/L: Zithini izinhlelo zakho zanonyaka?
Mjwara: Ngifuna ukwenza kahle kwiComrades, ngingene ngaphansi kwamahora awu-6 njengoba nyakenye ngiqala, ngiqophe u-6:03 ngaphuma unombolo 53.
I/L: Yini ofisa ukuyenzela abazali bakho?
Mjwara: Ngifisa ukubakhela umuzi, ngibonge ugogo ngokusikhulisa kanzima saze saba ngaka.