NGUMENGAMELI wase-USA, uMnu Donald Trump, ovale uxhaso lwezempilo.

Uvaleke thaqa umpompi woxhaso lwezempilo oluvela eMelika

INTATHELI YELANGA

USUVALEKE unomphela umpompi woxhaso lwezempilo obeluqhamuka kuhulumeni wase-United States of America (USA), obelulekelela iNingizimu Afrika ezinhlelweni zokulwa nengculaza.
   Izinhlangano ebezithola uxhaso olubizwa ngePresident's Emergency Plan for Aids Relief (Pepfar), obelukhishwa ngaphansi kwe-United States Agency for International Development, (USAID), kubikwa ukuthi zithole izincwadi ezichazayo ukuthi ngeke luphinde lutholakale.
   Indaba yalolu xhaso ibe sematheni ngesi-khathi uMengameli wase-USA, uMnu Donald Trump, ememezela ukuthi uyalumisa  okwe-sikhashana. Wathi usalubuyekeza, bese ethatha isinqumo sokuthi luqhubeke lutholakale noma lunqanyulwe unomphela.
   UTrump wamemezela ukumiswa kwalolu xhaso emuva kwesikhashana nje egcotshiwe kulesi sikhundla ngoMasingana (January) nonyaka. I-Pepfar yethulwa ngo-2003, ukusiza amazwe okubalwa kuwona neNingi-zimu Afrika, obekubonakala kudlobe kuwo inkinga yengculaza.
    Kusukela lwaqala lolu xhaso, iNingizimu Afrika kubikwa ukuthi ibisithole imali elinganiselwa ku-R145 billion.
   Izinhlangano okubikwa ukuthi zigqemeke engeqiwa ntwala ngokuvalwa kwalolu xhaso kubalwa kuzona i-Anova Health Institute, eyinhlangano ezimele, engenzi nzuzo, ebile-kelela ngokuhlolwa kwabantu iHIV, nangoku-hlinzeka ngemishanguzo kweminye imitho-lampilo kahulumeni ebidinga usizo.
   Ziningi nezinye izinhlangano ebezilekelela ngokuhlinzeka ngemishanguzo kwabaphila neHIV. Njengoba isimo sesinje, sekulindeleke ukuba uhulumeni waseNingizimu Afrika uthwale izindleko zokuhlinzeka ngemisha-nguzo nosizo obelulethwa yilezi zinhlangano.
   Kunovalo lokuthi abantu abadla imisha-nguzo yeHIV, abebehlinzekwa yilezi zinhla-ngano, basengcupheni, kodwa uMnyango wezeMpilo kuleli, phambilini uthe abantu mabehlise amaphaphu, kuzoqhubeka ukutholakala kwemishanguzo.
*NEWS24