NGU-ZECA Marques okuvela ukuthi wehlisiwe esigqikini sokucija iBlack Leopards ngenxa yemiphumela yakamuva. 

ISITHOMBE NGABE: BACKPAGEPIX

Mfanafuthi Ndlovu

KAZENEME izikhulu zeBlack Leopards ngemiphumela  yakamuva yale kilabhu egijima kwiMotsepe Foundation Championship (MFC).

ILANGA Lempelasonto selihoshe ukuthi uZeca Marques okuthuse abaningi ukuqashwa kwakhe yile kilabhu njengenhloko yabaqeqeshi, usehliselwe esikhundleni sokuba yiphini lesithathu kule kilabhu.
UJoel "Mpholifithi" Masutha nguyena osengumqeqeshi.
Kuthiwa u-Abel Makhubela uzokuba yiphini lesibili likaMasutha bese uMarques ehlele kwelesithathu, yize kungacaci ukuthi uzozamukela yini lezi zinguquko.

Sekuwumlando ukuthi uMarques ubengene kulesi sikhundla ngokuqala kukaJanuary esikhundleni sikaMaxwell Konadu obhinjelwe yizinto zibekwa.

UMasutha akamusha kulo msebenzi kwazise useke wayibamba nakwiReal Kings, yiRoyal AM, iChippa United neVenda FC ukubala nje ambalwa.
UMarques wazakhela udumo esalolonga iMoroka Swallows ayinqobisa iMTN Cup ngo-2012

Emdlalweni olandelayo, iLeopards izobhekana neBaroka FC nayo esanda kubuyisa uDan "Dance" Malesela osanda kufakwa amasondo yiMarumo Gallants egijima kwiBetway Premiership.

Iphunzile imizamo yokuthola uTshifhiwa "Chief" Thidiela ongusihlalo weLeopards, ukuqinisekisa lezi zindaba. Ucingo lwakhe belukhala lungabanjwa, kodwa washiyelwa umlayezo.
Kuze kwashaya isikhathi sokuloba engawuphendulile.