Ezemidlalo | 17
Friday, 21 Marc 2025
NGU-LAUTARO Martinez noLionel Messi abangeke babonakale emdlalweni we-Argentina ne-Uruguay wokuhlungela indebe yomhlaba.
IZITHOMBE NGABE: BACKPAGEPIX
LIBHEKENE nengwadla yokulinyalelwa ngabadlali iqembu lesizwe lase-Argentina ngaphambi kwemidlalo emibili yokuhlungela iNdebe yoMhlaba yeFifa; okungelizowudlala ne-Uruguay kusasa ngoMgqibelo ngo-01h30 nomunye elizowugijima ne-Brazil ngoLwesithathu ngo-02h00.
Emuva kwezindaba zokulimala kukaLionel Messi, sekuvele ezokulimala komgadli omqoka wale kilabhu, uLautaro Martinez ogijima kwi-Inter Milan yase-Italy.
Lokhu kuqinisekiswe yi-Argentina Football Association (AFA) - ephethe unobhutshuzwayo kuleliya lizwe - ngoLwesithathu.
Ithe uMartinez ngeke esaba yingxenye yale midlalo phezu kokuba kade ebizelwe eqenjini likaLionel Scaloni ongumqeqeshi.
Kuzokhumbuleka ukuthi i-Argentina yiyona evikela isicoco semhlaba eyasinqoba ngo-2022 eQatar, ihlula iFrance ngo-4-2 wamaphenathi. Umdlalo wawuphele zibambene ngo-3-3.