Lihlehliselwe inyanga ezayo elaboMnyango wezeMpilo eKZN:

ZIVELE kafushane eNkantolo yesiFunda eManguzi, izisebenzi zoMnyango wezeMpilo, KwaZulu-Natal, ezibhekene namacala athinta umkhonyovu ka-R3 million. Lezi zisebenzi ezine, zisebenza esibhedlela eMseleni, eMbazwana, eMkhanyakude.

Amacala eziboshelwe wona awokuziholela
imali engagunyaziwe ngumnyango, phakathi kweminyaka -2021 no2023. Bazobuyela enkantolo ngomhlaka 16 kuMbasa (April) njengoba bededelwe ngebheyili.

 Ziphinde zamkhalela owokufika oduna izimoto:

OWOKUDABUKA eMozambique, odume ngokuduna izimoto, uboshwe ngamaphoyisa aKwaZulu-Natal, eshayela iloli elinenqola endaweni yaseThandizwe, eManguzi, enyakatho-mpumalanga neKZN, ebeliduniwe.

Amaphoyisa, athe uma elimisa leli loli, ngoba elisola, athola ukuthi ladunwa eNigel, eGauteng, ekuqaleni kwale nyanga kaNdasa (Macrh).

Amaphoyisa abuye athola ukuthi lo mlisa  ungaphandle ngebheyili njengoba waboshelwa ukuduna izimoto eBedfordview nase- Alberton, eGauteng. Kusolakala ukuthi leli loli beselisendleleni ebheke eMozambiuqe.

 URamaphosa ukhalisane nabenkolo yamaHindu ngokudlula komholi wabo:

UMENGAMELI uCyril Ramaphosa, usebe ngomunye wababhonge emswanini ngokwedlula emhlabeni komholi wenkolo yamaHindu obehlonishwa, uMnu. u-Ashwin Trikamjee. UMnu. uTrikamjee, udlule emhlabeni ngoLwesithathu ebusuku, eneminyaka ewu-80.

Ubengummeli ngokuqeqeshwa, enguMengameli we-Association for Law Societies. Wake waba yiphini likamengameli weSouth African Soccer Association (SAFA).
Emzabalazweni wenkululeko, wabamba iqhaza njengoba ebeyilungu leNatal Indian Congress.

UMengameli uRamaphosa, uthe umethulela isigqoko uMnu Trikamjee, ngokuba yisibonelo esihle emphakathini abewuhola, futhi elwela ukuphucula impilo yabantu.

 Intuthukelo ngenkinga yamanzi eMkhanyakude:

UBUHOLI be-EFF KwaZulu-Natal, buthi akwamukeleki ukuthi abantu baseMkhanyakude bangaswela amanzi ekubeni le ndawo inodedangendlale wedamu, elingelinye lamadamu amakhulukazi ezweni.

I-EFF ibhikishe yaya emahhovisi kamasipala wesifunda uMkhanyakude, eMkhuze, iyokwethula izikhalo ngendaba yokushoda kwamanzi kule ndawo. Inqumele umasipala ugwayi katiki ukuba uphendule ezinsukwini eziwu-7  mayelana nale nkinga yamanzi.

Ifuna umasipala ukhiphe usuku oluqondile lokuthi umphakathi uzowathola nini amanzi.
Incwadi yezikhalo yemukelwe yiMeya uMnu Siphile Mdaka, yathembisa ukuthi bazophendula. Uthe wonke umuntu
ufanelwe ukuthola amanzi.