Kuqubuke indida kubulawa abathathu   endaweni yokucima ukoma

Lesi sigameko senzeke ebusuku abantu bebuka ibhola, kushone nomnikazi wayo le ndawo eseLovu

Skhosiphi Mthembu 

UTHUKA izanya umphakathi waseZamani, eLovu, kulandela isigameko sokudutshulwa kubulawe abantu abathathu, kwalimala omunye kanzima endaweni yokucima ukoma. Lesi sigameko senzeke ngoLwesibili ebusuku. Sishiye umphakathi nomakhelwane beshaqekile njengoba kubulawe nomnikazi wendawo yokucima ukoma.

Ngokuthola kweLANGA Lempelasonto, kubikwa ukuthi isigameko sokubulawa kukaMnu Lovermore Julius ongumnikazi wendawo yokucima ukoma, uMnu Mduduzi Ntuli (34) noMnu Bhekithemba Msomi (47), senzeke kukhona abantu abebengaphakathi, bebuka ibhola ngezithuba zabo 8 ebusuku. Kubikwa ukuthi kugasele amadoda angaziwa, angakhu-luma okuningi, avulela ngenhlamvu.

ILANGA Lempelasonto lizifikele mathupha endaweni yesigameko. Ububona useza kude ukuthi lukhulu olwenzekile njengoba beku-cwebile ngaphandle. Uma usondela ngakhona, bekunomaka begazi abebesabonakala emgwaqweni.

Uma usondela emnyango ongenela kule ndawo, bekunamalungu omndeni womunye wabadutshuliwe, namanye amalungu omphakathi, bekhuculula igazi phansi. Elinye ilungu lomnde-ni leli phephandaba elilifice lingaphakathi, lithe kalazi ukuthi yini imbangela yokuhlaselwa kwale ndawo.

"Nami ngithole ucingo ebusuku, ngitshelwa ukuthi isihlobo sami silimele ngesikhathi kugasela abantu bedubula. Kangibange ngisaya endaweni yesigameko, kodwa ngivele ngaqo-nda esibhedlela njengoba besiphuthunyiswe khona. Isihlobo sifike sashonela khona. Kasiyazi imbangela yokubulawa kwabo," kusho lona.

Okhulumela amaphoyisa KwaZulu-Natal, uCapt Ntathu Ndlovu, uthe kuvulwe amacala amatha-thu okubulala, nelilodwa lokuzama ukubulala. 

* Khonamanjalo amaphoyisa asekhiphe umehlokaboni ka-R60 000 kulowo ongaba nolwazi olungaholela ekuboshweni kwabasolwa ngokubulala abantu abawu-6, esigamekweni esenzeka ngonyaka odlule eMlazi.

Kulesi sigameko kwadutshulwa kwabulawa uMnu Khaliphinde Ntombela (37), uMnu Yamukela Mzekeli (29), uMnu Mlungisi Langa (40), uMnu Sinqobile Ngcobo (30) noMnu Dumisani Mgoza (39).
Kucelwa noma ngubani ongaba nolwazi axhumane nomphenyi wecala uDetective Sergeant Jili kule nombolo ethi: 0796963685, noma ashayele eyamahhala ethi: 0860010111.