Ezemidlalo | 20
Friday, 11 FApril 2025
IChiefs ifunga iyagomela ngeNedbank Cup
Sekuyezwela nakubadlali beziMpofana ukuba yinhlekisa kwabathandi bazo ezitheni
NGUWANDILE Duba ongelinye lamathemba eChiefs phambi kwamapali.
ISITHOMBE NGABE: BACKPAGEPIX
Mfanafuthi Ndlovu
UFUNGA uyagomela umgadli weKaizer Chiefs ukuthi nakanjani bazoyiqeda indlala yezicoco ePhefeni ngokunqoba iNedbank Cup yangale sizini ka-2024/2025.
UWandile Duba wenze lesi sethembiso esinzima ngaphambi komdlalo obhekwe ngabomvu weziMpofana neMamelodi Sundowns weSemi final yeNedbank Cup ozokuba ngeSonto ngo-18h00 eLoftus Stadium, ePretoria.
Kwi-semi final yokuqala kuzogadulisana i-Orlando Pirates neMarumo Gallants ngosuku olufanayo ngo-15h00 e-Orlando Stadium, eSoweto.
IPirates ilwela ukunqoba lesi sicoco okwesithathu kulandelana njengoba yenzile nangeMTN8.
IZITOBHA zeziMpofana zinomthwalo onzima wokuvimba uLucas Ribeiro uma la makilabhu esebhekene ngeSonto koweNedbank Cup.
ISITHOMBE NGABE: BACKPAGEPIX
Ukubuyela odabeni lukaDuba - oshayele iziMpofana igoli emdlalweni odlule ngesikhathi zibambana neTS Galaxy kuba ngu-1-1, ePolokwane - uthi bazimisele ukwesula abalandeli babo izinyembezi ngokutholela le kilabhu imiphumela ejabulisayo kusuka kwiSemi final yeNedbank Cup, okuyisicoco abasifuna eNaturena kule sizini.
"Amaphutha ayenzeka, nakanjani sizowalungisa emdlalweni ozayo. Ngizoqinisekisa ukuthi ibhola elilandelayo engizoligoba lizokuba yigoli. Sisebenzela phezu kwalokho ejimini.
Abalandeli bethu bafanelwe yinjabulo ngendlela abaseseka ngayo kumnyama kubomvu.
"Siyazi ukuthi sesibaphoxe kakhulu ngokunganqobi, kodwa-ke siyakha, kancane kancane kuzolunga. Sizolwela ukufela enkundleni ukunqoba iNedbank Cup. Ngiyethembisa ukuthi lesi sicoco sizosinqobela abalandeli bethu," esho.
Yize ekhuluma ngalolu hlobo uDuba, kodwa wazi kahle kamhlophe ukuthi bazothwala kanzima kulo mdlalo njengoba iSundowns ingagayelwa mphako.
Emidlalweni emithathu egijinywe yila makilabhu kule sizini, iSundowns iyinqobile. Kube ngu-2-1 emzuliswaneni wokuqala weligi, kwaba ngu-4-0 kwiCarling Knockout Cup, kwaba ngu-1-0 emzuliswaneni wesibili weligi.