NGUBAYANDA Walaza oqophe irekhodi elisha lamajuniya.

Mzwamandla Zondi

BAQOPHE umlando abasubathi baseNingizimu Afrika emlenzeni wesibili we-Athletics South Africa (ASA) Grand Prix obungoLwesithathu eGoli.

Lo mjaho ubungenelwe ngabasubathi abaningi abanohlonzo bakuleli nabangaphandle. Iningi labo beliye kulo mjaho ukuyozama ukuzibekisela indawo kwiWorld Athletics Championships ezokuba ngoSeptember eChina.

UBayanda Walaza uphinde wazifaka ezinhliziyweni zabathandi bezokugijima kuleli enza u-20:08 kwi-200m, okuyirekhodi elisha lamajuniya lakuleli. Lesi sikhathi sifake lo msubathi kwiWorld Championships njengoba isikhathi sokuya kulo mqhudelwano kuwu-20.16 sec.

Wenza lesi sikhathi nje, ngeledlule ubeke irekhodi elisha lamajuniya le-100m, okuwu-9.99 sec, egijima kwiGauteng North Athletics Championships, ePretoria.
Naso lesi sikhathi siyamfaka eqenjini lesizwe eliya eChina.

NGUTUMI Ramakgopa obakhombise izithende kwi-100m hurdles.

UWalaza uke waba sematheni ngesikhathi iqembu abeye nalo kwi-Olympics Games, eFrance ngonyaka odlule, lihlomulela izwe indondo yesiliva kwi-4x100m.

Ngemuva kwalokho, uthole izicelo ziphuma ezikhungweni zemfundo zaphesheya ukuba ayozigijimela, kodwa wenqaba.

Omunye umsubathi wakuleli wesigaba samajuniya owenze kahle ngoLwesithathu, kube nguTumi Ramakgopa naye owenze irekhodi lamajuniya kwi-100m hurdles. Wenze u-13.22 sec.

UViwe Jingqi ubuye mawala waqopha u-11.32 kwi-100m.
Abasubathi bakuleli abenza i-track and field bazophinde bakhiphane inkani kwi-ASA National Track & Field Championships ezokuba sekupheleni kuka-April, eNorth West.