BHEKI NDLOVANA

KUBONAKALA izimpawu ezikhomba ukusimama kwesimo sephakethe kubathengi baseNingizimu Afrika emuva kweminyaka embalwa benswinyekile ngokwemali. 

Ngokusho kweStandard Bank, nakuba abathengi abaningi bebesaklinyekile ngo-2024, kodwa kubonakala sengathi isimo siya ngokubangconywana. Lokhu  kufakazelwa wukwenyuka kwezinga labantu abatshengise ugqozi lokufuna ukuthenga izimoto ngawo unyaka odlule.
Lokhu kusimama kancane kwephakethe kukholakala ukuthi kudalwe nawukwe-hliswa kwenzalo yemalimboleko okuqale ngonyaka odlule.

Leli bhange libika ukuthi uphiko lwalo olubolekisa ngemali yokuthenga izimoto,  iStandard Bank Vehicle and Asset Finance (VAF) liqophe ukwenyuka ngo 5% kwesi-balo sabantu abafake izicelo zemalimbo-leko yokuthenga izimoto.
 
UMnu Derick De Vries, oyiHead of Automotive Retail eStandard Bank, uthi akumangazi ukubona lo mnyakazo wokwenyuka kwezinga labantu abafuna ukuthenga izimoto njengoba kwehle inzalo yemalimboleko nyakenye. ISouth African Reserve Bank (SARB) yayenyusa kakhulu  inzalo yemalimboleko ngo-2021.

Yaqhubeka nokuba phezulu, kuze kwathi ngoSepthemba wonyaka odlule iSARB yayehlisa kancane ngo 0.25%,  ngoNovemba yehliswa ngo-0.25%, kwathi ngoJanuwari nonyaka yehliswa ngo 0.25%. Isinqumo esilandelayo sizomenyezelwa ngoMashi mhla  ka-20 nonyaka.

Okunye okuvezwe yiStandard Bank wukuthi nakuba abantu bekhombisa intshisekelo yokuthenga izimoto, kodwa iningi lincamela ukuthenga ezingamase-keni. Izinga lokuthengwa kwezintsha ngosizo lwemalimboleko yaleli bhange, zehle ngokulinganiselwa ku-30% ngo-2024 uma kuqhathaniswa nango-2023.

Okunye okubalulwa yiStandard Bank, wukuthi  lenyukile izinga labafake izicelo zosizo lwemalimboleko yokuthenga izimoto ngoJanuwari nonyaka. Kungenzeka ukuthi lo mnyakazo udalwe ngabantu abasuke beyoqala emisebenzini emisha ehambi-sana neholo elithe xaxa.

Ngakolunye uhlangothi, ulwazi oluqoqwayo lukhombisa ukuthi ngoDisemba livame ukwehla izinga labantu abathenga izimoto, bese liyenyuka ngoJanuwari.