Senzo Sokhela

WENZA isicelo kubathandi bebhola baKwaZulu-Natal umqeqeshi weStellenbosch FC, uSteve Barker.

IStellies izobhekana neSimba SC yaseTanzania emlenzeni wesibili koweCaf Confederation Cup ngeSonto ngo-15h00 eMoses Mabhida Stadium, eThekwini.

Emlenzeni wokuqala iStellies iguqe ngo-1-0.
Idlala umlenze wesibili eThekwini nje, inkundla yayo iDanie Craven eseStellenbosch, kayiphasiswanga yiCaf, kanti lezi ezinye (zaseWestern Cape) zibhukhiwe, kayikwazi ukudlala kuzona le midlalo.

USIHLE Nduli weStellies exine uKibu Prosper weSimba emlenzeni wokuqala wala makilabhu obuseTanzania ngeledlule.

ISITHOMBE NGABE: BACKPAGEPIX

UBarker wenza isicelo ebantwini baKwaZulu-Natal ngalo mdlalo.

"Lo mdlalo umqoka ngendlela eyisimanga kithina, kufanele siwunqobe kumnyama kubomvu.
"Inkinga esibhekene nayo wukuthi imidlalo yethu yeCaf kasikwazi ukuyidlalela enkundleni yethu, kufanele siyilethe eThekwini, okwenza kube nzima kubalandeli bethu ukuzoseseka.

"Engikucelayo ebantwini baKwaZulu-Natal wukuthi bazosisiza basifake umfutho, bazoseseka kulo mdlalo.

"Siludinga ngendlela eyisimanga usizo lwabo kulo mdlalo," kusho uBarker odabuka eThekwini.