Ezemidlalo | 17
Friday, 11 April 2025
Usenukelwa yisicoco seCaf ukaputeni weSundowns
UWilliams uthi kuguquke umlando beguqisa okokuqala emlandweni i-Esperance yaseTunisia
NGU-RONWEN Williams ongukaputeni weDowns.
ISITHOMBE NGABE: BACKPAGEPIX
Senzo Sokhela
UVEZA umuzwa omfikele emuva kokuba ezakhe zidlulele kwiSemi final yeCaf Champions League unozinti weMamelodi Sundowns, uRonwen Williams.
IDowns idlulele kulesi sigaba salo mqhudelwano emuva kokuhlula i-Esperance yaseTunisia ngo-1-0, sekuhlanganiswe yomibili imilenze yama-quarter final alo mqhudelwano.
Emlenzeni wokuqala obungeledlule eLoftus Stadium, ePitoli, iDowns inqobe ngo-1-0, kwathi kowesibili obuseTunisia zabambana ngo-0-0.
Izobhekana ne-Al Ahly yase-Egypt emlenzeni wokuqala we-semi final ozokuba ngoLwesihlanu oluzayo eLoftus Stadium, ePitoli.
I-Al Ahly yona izibekisele indawo kuma-semi final ihlula i-Al Hilal yaseSudan ngo-2-0 sekuhlanganiswe yomibili imilenze.
Inqobe ngo-1-0 kuyona yomibili imilenze.
BASALE begobodisile abadlali be-Esperance emuva kokuguqiswa yiDowns kwiQuarter final yeCaf Champions League.
ISITHOMBE NGABE: BACKPAGEPIX
UWilliams uveza umuzwa omfikele emuva kokuba ezakhe zidlulele kuma-semi final alo mqhudelwano.
"Ngesikhathi sibehlulela ekhaya, umlando ushintshile kwazise besingakaze sibaguqise phambilini. Emuva kokubakhipha, ngifikelwe wumuzwa wokuthi le nkomishi ngeyethu ngale sizini.
"Ngethemba ukuthi kuzoba njalo yize kuseza umdlalo onzima we-Al Ahly," esho.
Umdlalo olandelayo weDowns ngoweSemi final yeNedbank Cup lapho izobhekana khona neKaizer Chiefs ngeSonto ngo-18h00 eLoftus Stadium.
Ilanga Lempelasonto