NGENHLA: NguJose Riveiro ongumqeqeshi wePirates, kwesobunxele ezansi, nguNasreddine Nabi weChiefs kanti kwesokudla nguMiguel Cardoso weDowns.

IZITHOMBE NGABE: BACKPAGEPIX

Senzo Sokhela

BATHEMBISA lukhulu abaqeqeshi bamakilabhu ayizinkunzi zaseGauteng azogijima imidlalo yama-semi final omqhudelwano weNedbank Cup.

I-Orlando Pirates izobhekana neMarumo Gallants kwi-semi final yokuqala  ngeSonto ngo-15h00 e-Orlando Stadium, eSoweto.
IMamelodi Sundowns izogadulisana neKaizer Chiefs kweyesibili ngeSonto ngo-18h00 eLoftus Stadium, ePitoli.

UJose Riveiro ololonga iBucs, uMiguel Cardoso weSundowns noNasreddine Nabi weChiefs, bathembisa lukhulu kubalandeli bala makilabhu ngokwahlukana ngabazokwenza kulo mqhudelwano.

URiveiro uthe: "Sidlalile neMarumo izinto zangasihambela kahle ngalesiya sikhathi (behlulwa ngo-2-0 koweligi nonyaka), kodwa manje sibe nethuba lokuyihlaziya.

"Iyindida njengoba seyinomqeqeshi omusha, kayiqondakali kahle, kodwa noma kanjani sizoya kulo mdlalo sisesimweni esihle ukuwunqoba."

YI-ORLANDO Pirates eziyizingqwele zeNedbank Cup, esemgqeni wokuyiqukula okwesithathu kulandelana.

ISITHOMBE NGABE: BACKPAGEPIX

UNabi uthe: "Njengoba siya kulo mdlalo, kangicabangi ngami kuphela, kodwa ngicabanga ngabalandeli nekilabhu nje yonke. Leli yithuba elimqoka kithina lokuthi sizibhalele umlando ngokudlulela kowamanqamu, siyinqobe futhi le nkomishi.
"Sesiside isikhathi singanqobi lutho. Leli yithuba lokuthi sibhale umlando wekilabhu."
UCardoso uthe: "Njengoba siya kulo mdlalo kuzofanele sizifuqe kuze kube sekugcineni.

"Sibhekene nekilabhu elolongwa ngumqeqeshi uNabi, ngakho-ke kumqoka ukuthi sihlale simi ngamanzonzwane ngaso sonke isikhathi. "Sizimisele ngokwenza kahle kakhulu kulo mqhudelwano."

U-Abdeslam Ouaddou opheka iMarumo, uthe bawulungiselele ngokweqophelo eliphezulu lo mdlalo. Uthe abadlali sebemagange ukubhekana nawo.
Uthe iPirates izothwala kanzima kulo mdlalo, ngeke bayenzele izinto zibe lula.