Basadunguza emnyameni aboKhozi FM ngezinkontileka

Mthobisi Sithole

KUSOLWA ukugqoza kohlelo lokuqashwa ngokugcwele kwabaphathi emsakazweni uKhozi FM, ekubambezelekeni kwezingxoxo zokuvuselelwa kwezinkontileka zabasakazi balo msakazo.
   Ngokuthola kweLANGA Lempelasonto, seziqalile izingxoxo kwezinye zeziteshi ezingaphansi kwale nhlangano yezokusakaza ngomoya iSouth African Broadcasting Corporation (SABC).
Phakathi kwaziteshi, kubalwa iMetro FM. 
    Omunye wezisebenzi zoKhozi FM, uthe njengoba kungakaphothulwa ukuqashwa kwabaphathi ezikhundleni eziphezulu, kungenzeka ukuthi ngenye yezinkinga eyenza ukuba izingxoxo zakulo nyaka zihambe ngonyawo lonwabu.
     "Akekho oqashwe ngokugcwele kulezi zikhundla okuthathwa kuzona izinqumo, bonke abakhona babambile. Lokho kungenza kube nzima ukuqalwa kwezingxoxo zokushintshwa kwabantu ezinhlelweni zabo nokuqedwa kwezinkontileka kwabanye bethu," kusho umthombo.
     Izikhundla ezivulekile kulo msakazo, kubambe uMandla Mdletshe kwesokuba ngumphathi wezinhlelo, kanti kwesokuphatha isiteshi kubambe uMnu Busani Mthembu.
      Kuvela ukuthi nakuba zingakaqali izingxoxo zokuvuselelwa kwalezi zinkontileka, kodwa sebenikiwe abasakazi izincwadi ezibakhumbuzayo ukuthi izinkontileka zabo ziyaphela ekupheleni kukaNdasa (March).
      "Izincwadi esizitholile ziyasho ukuthi uma umsakazo uzobe usakudinga, kuzoxoxiswana nawe njengomsakazi," esho.        Ngokusho kwezisebenzi zale nhlangano, zithi kuyaqala ukubambezeleka kwezingxoxo kangaka, njengoba kulindeleke ukuba ngomhla ka-1 kuMbasa (April) kwenzeke izinguquko ezinhlelweni.
    Okhulumela iSABC uNkz Mmoni Seopelelo, uthi izingxoxo zokuvuselelwa kwezinkontileka, ziphakathi kwezisebenzi nomqashi.
   "Ukuxoxwa nabasakazi kuzoqala ngenyanga ozayo, kuphakathi komqashwa nomqashi," kusho uNkz Seopelelo.
mthobisis@ilanganews.co.za