UNDUNANKULU waKwaZulu-Natal, uMnu uThami Ntuli, usengenelele ngenhloso yokutakula uMasipala waseMsunduzi, osezinkingeni. NgoLwesithathu, ube nomhlangano oyinguyazana nesigungu sikaMasipala waseMsunduzi, namalungu esiShayametho saseKZN.

Kulo mhlangano kubunjwe ithimba elaziwa ngokuthi yiPremier's uMsunduzi Working Group, elizosebenza njengalelo elajutshwa nguMengameli uCyril Ramaphosa, ukutakula iTheku, i-eThekwini Presidential Task Team.

UMnu uRavi Pillay, owake waba ngungqongqoshe wezokuThuthukiswa koMnotho nezokuVakasha esifundazweni, nguyena oqokwe waba nguSihalo wethimba elizohlenga uMasipala waseMsundizi, oyiNhlokodolobha yesifundazwe.

UNgqongqoshe wezokuBusa ngokuBambisana neziNdaba zoMdabu eKZN, uMfundisi uThulasizwe Buthelezi, ubhalele ikomidi likaZwelonke loMnyango, echaza ngesimo saseMsunduzi, njengoba kusukela ngonyaka odlule lo Masipala ubungaphansi kweso lomlawuli.

 LUHAQWE yizinkinga uhlelo olusha lwamakhadi asePosini okuhola izibonelelo zikahulumeni, njengoba kuvela ukuthi aluhambi kahle.
Bekuhlelwe ukuthi lawa makhadi amasha asePosini, anombala omnyama, aqale ukusebenza kusukela ekuqaleni kukaNdasa (March). Lawa makhadi amasha asePosini angena esikhundleni samakhadi okuhola akwaSASSA anombala osagolide.
Ekomidini lasePhalamende eliqondene nezokuThuthukiswa koMphakathi kuvele ukuthi luhamba ngonyawo lonwabu iPosi ukunikezela ngalawa makhadi kubantu abahola izibonelelo.
 
Leli komidi eliholwa nguNkk Bridget Masango onguSihlalo walo lizwakalise ukukhathazeka ngokundonda komsebenzi wePosi wokukhipha lawa makhadi amasha. Amalungu aleli komidi athi abone isimo esingagculisi ezikhungweni zasePosini abevakashele kuzo ngesonto eledlule, eyohlola ukuthi kuhamba kanjani ukwenzelwa kwabantu lawa makhadi.

Kutholakale ukuthi abantu bama kolayini abade kakhulu isikhathi eside, abanye baze babuyiselwe emakhaya bengasizakalanga.
Enye inkinga okubikwa ukuthi ikhona ePosini ekhinyabeza ukukhishwa kwalawa makhadi, ubuhixihixi obukhona kwezobuchwepheshe.
Leli komidi lithi aliboni ukuthi iPosi lizokwazi ukuhlangabezana nosuku lomnqamulajuqu wokushintshwa kwamakhadi okuhola, okuwumhla ka-20 kuNdasa.

Lithathe isinqumo sokubiza izikhulu zePosi ukuba ziyochaza ePhalamende ngokwehluleka wukwenza umsebenzi ngendlela efanele.

 IQEMBU i-Economic Freedom Fighters (EFF), selinxenxe uhulumeni, ukuthi uthathe izinhlangano ezilwela amalungelo esizwe samaBhunu,
i-Afriforum neSolidarity, njengemavukela-mbuso.

Okhulumela i-EFF, uMnu Sinawo Tambo, uthi uhambo oluthathwe yilezi zinhlangano zamaBhunu, ekuqaleni kwaleli sonto, ngesikhathi ziyobonana nezikhulu zoMbuso waseMelika, eWhite House, lukhombisa ukuthi kazilikhathalele leli zwe.

Uthe isizwe samaBhunu sinodedangendlale wemihlaba esingafuni ukuhlalisana kuwo nezinye izizwe.

 UMnu. uKallie Kriel, oyiChief Executive Officer (CEO), ye-Afriforum, uthi lokhu okushiwo yi-EFF. kuqhelelene neqiniso ngoba into abayifunayo bona ukulonda nokuqhakambisa lokho okuyigugu lesizwe samaBhunu. Uthi lokhu okushiwo yi-EFF, ngeke kwenze bashintshe kulokho abakholelwa  kukho.