NGU-ASHLEY Du Preez ongumgadli weChiefs.

ISITHOMBE NGABE: BACKPAGEPIX

Senzo Sokhela

UVEZA isifo athi besilokhu sibancunza kancane kancane selokhu kuqale isizini kwaze kwagcina sekwenzeke umonakalo u-Ashley du Preez ongumgadli weKaizer Chiefs.

IChiefs izobhekana neMarumo Gallants koweBetway Premiership ngoMgqibelo ngo-15h00 eFNB Stadium, eSoweto.

KULINDELE ukuba ishube impi phakathi kwabagadli beGallants nezitobha zeChiefs njengoba kubonakala uGabadinho Mhango ekhomba ngenjumbane uReeve Flossler ome nozakwabo u-Inacio Miguel.

ISITHOMBE NGABE: BACKPAGEPIX

UDu Preez uthi ukuhluleka kwabo bengabadlali ukubamba umgqigqo selokhu kuqale isizini, yisona sifo esibashayile kwaze kwagcina kwenzeka umonakala oholele ekutheni bagcine sebetibulela ukuqeda isizini bekwi-top 8.

"Kulezi zinsuku ezimbili ezedlule, konke kubukeka kuhamba kahle, sijima ngokuzikhandla kwazise sibuya emdlalweni esithole kuwona umphumela ongasigculisanga (weChippa United ophele ngo-0-0).

"Emdlalweni owedlule weChippa, besiwafuna ephelele amaphuzu, kodwa ngebhadi kwangenzeka. Isifo esinaso selokhu kuqale isizini, wukuhluleka ukubamba umgqigqo.

"Njengoba siya kulo mdlalo weMarumo, kufanele sikuqinisekise ukuthi sibuya namaphuzu aphelele, bese sizama ukubamba umgqigqo kuze kube kuyophela isizini,'' kusho uDu Preez.

Imidlalo yeBetway Premiership isiyonke ngale mpelasonto iqhathwe kanje:
NGOMGQIBELO
E-FNB Stadium: Kaizer Chiefs vs Marumo Gallants 15h00.
E-Old Peter Mokaba Stadium: Polokwane City vs SuperSport United 15h00.
EMpumalanga Stadium: Golden Arrows vs AmaZulu 15h00.
NGESONTO
EDobsonville Stadium: TS Galaxy vs Sekhukhune United 15h30.