Ezemidlalo | 18
Friday, 11 April 2025
OweBucs uncome ibhola elibi elidlawe ngezakhe zinqoba kwiCaf
URiveiro uthi vele emqhudelwaneni onjengalona akudingeki ibhola elihle, kufanele udlalele ukunqoba
KUBE wumdlalo onezigemegeme phakathi kweBucs neMC Alger yase-Algeria njengoba nabalandeli bebeze babanjwe ngesidlozana ngonogada imimoya isiphezulu.
ISITHOMBE NGABE: BACKPAGEPIX
Senzo Sokhela
UMQEQESHI we-Orlando Pirates, uJose Riveiro, uthi ibhola elibi elidlalwe ngezabo yilona elibafake kumaSemi final eCaf Champions League.
IBucs idlulele kuma-semi final alo mqhudelwano ihlula iMC Alger yase-Algeria ngo-1-0 sekuhlanganiswe yomibili imilenze.
Emlenzeni wokuqala e-Algeria, inqobe ngo-1-0 ngeledlule, kwathi kowesibili obungoLwesithathu ebusuku e-Orlando Stadium, eSoweto, yabambana ngo-0-0 nale kilabhu.
KUSUKE esinamathambo emuva komdlalo ibhentshi leMC Alger libambana ngezihluthu nabadlali bePirates.
ISITHOMBE NGABE: BACKPAGEPIX
IBucs izobhekana nePyramids yase-Egypt kwi-semi final ezokuba ngoLwesihlanu oluzayo e-Orlando Stadium, eSoweto.
IPyramids inqobe ngo-4-3 kwiRabat yaseMorocco sekuhlanganiswe yomibili imilenze.
Inqobe ngo-4-1 ekhaya, yehlulwa ngo-2-0 ngoLwesithathu ebusuku eMorocco.
NGUMQEQESHI wePirates, uJose Riveiro
ISITHOMBE NGABE: BACKPAGEPIX
URiveiro uthi kuma-semi final bafakwe yibhola elibi elidlalwe ngezabo.
"Kangifuni ukuqamba amanga, kuyona yomibili imilenze kasidlalanga ibhola elibukeka kahle emehlweni, sidlale ibhola elibi.
Emqhudelwaneni onjengalona vele kakufuneki ibhola elihle, kunzima, kufanele udlalele ukunqoba.
"Ngokwami nje, sibe ngcono kune-Alger kuyona yomibili imidlalo, yize sidlale ibhola elibi," esho uRiveiro.
Nakulo mdlalo kusuke uthuthuva abadlali be-Alger belwa, bengakwamukeli ukwehlulwa kwaze kwangenelela amaphoyisa ukudambisa isimo.
Emdlalweni olandelayo wePirates, izobhekana neMarumo Gallants kwiSemi final yeNedbank Cup ngeSonto ngo-15h00 e-Orlando Stadium.
Ilanga Lempelasonto