NGABADLALI be-Orlando Pirates (kusuka kwesobunxele) nguMohau Nkota, uRelebohile Mofokeng, u-Evidence Makgopa (ongemuva) noDeon Hotto benomqeqeshi wabo, uJose Riveiro. 

ISITHOMBE NGABE: BACKPAGEPIX

Senzo Sokhela

ITHEMBA emakilabhini aseNingizimu Afrika ngokudlulela kumaSemi final eCaf Champions League njengoba eyinqobile ngokwahlukana imilenze yokuqala yama-quarter final.

I-Orlando Pirates neMamelodi Sundowns yiwona makilabhu amele iNingizimu Afrika kuma-quarter final alo mqhudelwano.
IDowns izobhekana ne-Esperance yaseTunisia emlenzeni wesibili weCaf Champions League ngoLwesibili ngo-21h00 eTunisia.
Emlenzeni wokuqala obungoLwesibili eLoftus Stadium, ePitoli, iDowns inqobe ngo-1-0 wegoli likaPeter Shalulile.

IBucs izogadulisana neMC Alger yase-Algeria ngoLwesithathu ngo-18h00 e-Orlando Stadium, eSoweto.
Yona inqobe ngo-1-0 wegoli likaMohau Nkota emlenzeni wokuqala obuse-Algeria ngoLwesithathu ebusuku.

NGABADLALI beDowns emuva kokuguqisa i-Esperance ngo-1-0 koweChampions League ngoLwesibili. Kusukela kwesobunxele nguRonwen Williams, nguGrant Kekana noLucas Suarez.

ISITHOMBE NGABE: BACKPAGEPIX

UGrant Kekana odlala emuva kwiDowns, uthe: "Siyazi ukuthi kuzokuba nzima ekuhambeni, ikakhulukazi njengoba bezobe bephambi kwabalandeli babo, kodwa sizolwa kuze kube sekugcineni."
UJose Riveiro ololonga iBucs yena uthe: "Kasibanga nomdlalo omuhle kwazise besihambile. Kulokhu sise-Orlando, phambi kwabalandeli bethu, kufanele sinqobe kumnyama kubomvu."
IBucs neDowns balwela ukunqoba lo mqhudelwano okwesibili ngokwahlukana njengoba kuyila makilabhu kuphela kuleli aseke ayiqukula le nkomishi.
IPirates yayinqoba ngo-1995 ihlula i-Asec Mimosa yase-Ivory Coast kanti iDowns iwudle ngo-2016 iguqisa iZamalek yaseGibhithe.

NGU-ANDRE de Jong weStellies ebanga ibhola noSallah Moussaddag weZamalek koweCaf Confederation Cup ophele ngo-0-0.

ISITHOMBE NGABE: BACKPAGEPIX

KoweCaf Confederation Cup, iStellenbosch FC izobhekana neZamalek emlenzeni wesibili ozokuba ngoLwesithathu ngo-18h00 eGibhithe.

Emlenzeni wokuqala obungoLwesithathu ntambama eDHL Cape Town Stadium, la makilabhu abambane ngo-0-0.

Isiyonke imiphumela yemilenze yokuqala yamaQuarter final eCaf Champions League imi kanjena: Pyramids 4, FAR Rabat 1; MC Alger 0, Pirates 1; Al Ahly 1, Al-Hilal 0; Sundowns 1, Esperance 0.

Imidlalo yomlenze wesibili imi kanje:
NGOLWESIBILI mhla ka-8 ku-April
Al-Hilal vs Al Ahly SC 21h00.
Esperance vs Sundowns 21h00.
FAR Rabat vs Pyramids FC 21h00.
NGOLWESITHATHU mhla ka-9
Orlando Pirates vs MC Alger 18h00.