Ezemidlalo | 19
Friday, 11 April 2025
Uzigqaje ngePSL eguqisa izingqwele zeCaf
Umqeqeshi weStellies uthi okwenziwe ngezakhe, yiSundowns nePirates kukhulumela iPSL
NGISIHLE Nduli (8) weStellies ejabula nozakwabo emuva kokuhlula iZamalek yase-Egypt.
ISITHOMBE NGABE: BACKPAGEPIX
Senzo Sokhela
UMQEQESHI weStellenbosch FC, uSteve Barker, ushaye izithenjwa ezihlonishwa i-Afrika yonkana wabe eseziqhoshela ngeligi yaseNingizimu Afrika, iBetway Premiership.
IStellies idlulele kumaSemi final eCaf Confederation Cup ihlula iZamalek yase-Egypt ngo-1-0 emlenzeni wesibili walo mqhudelwano ngoLwesithathu ebusuku eCairo.
Igoli leStellies livalelwe enethini nguSihle Nduli. Kube ngu-1-0 sekuhlanganiswe yomibili imilenze.
Kwi-semi final, iStellies izobhekana neSimba SC yaseTanzania elolongwa nguFadlu Davids wakuleli.
Umlenze wokuqala uzokuba ngomhla ka-20 kwephezulu eTanzania.
NGU-STEVE Barker ongumqeqeshi weStellies.
ISITHOMBE NGABE: BACKPAGEPIX
UBarker ekhuluma nabezindaba emuva kokushaya iZamalek - okuyiyona ebivikela lesi sicoco - uqhoshe ngeBetway Premiership.
"Emlenzeni wokuqala siyinike inhlonipho iZamalek ngenxa yomlando wayo kulo mqhudelwano kwazise ibiyizingqwele kanti ike yanqoba neChampions League izikhashana eziningi.
"Besinakho ukuyesaba, kodwa emuva kokudlala nayo sibonile ukuthi sizokwazi ukuyehlula esibayeni sayo. Ngiyajabula ngokwenzekile, ngethemba ukuthi abantu babonile ukuthi iligi yaseNingizimu Afrika inkulu kangakanani.
"Buka nje yi-Orlando Pirates, yiMamelodi Sundowns nathi sikuma-semi-final eCaf. Lokho kukubeka ngokusobala ukuthi kakufanele ithathwe kalula iligi yethu, inkulu," kusho uBarker ephakathi kwezintatheli zase-Egypt ebezigcwele phama.
Ilanga Lempelasonto