NGUKHULISO Mudau weBafana eqashwe ngelokhozi nguMorgan Poaty weCongo Brazzaville komunye wemidlalo yokuhlungela iNdebe yoMhlaba yeFifa. 

ISITHOMBE NGABE: BACKPAGEPIX

Mfanafuthi Ndlovu

BAMISE isibindi abalandeli bakanobhutshuzwayo baseNingizimu Afrika abadlali beBafana Bafana ezokhiphana inkani neLesotho kowokuhlungela iNdebe yoMhlaba ngoLwesihlanu ngo-18h00 ePeter Mokaba Stadium, ePolokwane.

Emuva kwalo mdlalo, iBafana izobhekisa amabombo e-Ivory Coast ukuyobhekana neBenin - kuwona umshikashika wokuhlungela eyomhlaba - ngoLwesibili ngo-18h00. 
Lo mdlalo uzogijinyelwa e-Ivory Coast ngenxa yokuthi izinkundla zaseBenin kazikho ezingeni leFifa.

U-Oswin Appollis odlala esiswini kwiBafana Bafana, ephawula ngezinhlelo zabo njengoba besekhempini, uthembise into yamehlo nokulwela ukungadumazi abalandeli abazophuma ngezinkani ukuyothamela lo mdlalo. Uthi lo mdlalo ufana nowamanqamu kubadlali.

"Ngeke nangengozi siyithathe kalula iLesotho.  Idlala ibhola elisheshayo, eligabe ngokugijima enkundleni. Kuzomele sisebenze ngokuphindiwe enkundleni ukuze sinqobe. Ebholeni kubalulekile ukuhlonipha izitha.

"Umqeqeshi wethu (uHugo Broos) uhlale ekugcizelela ukuthi wonke amazwe ahlale eza nazo zonke izikhali kwiBafana Bafana, ngakho-ke kufanele siqaphele zonke izimo ezinzima esingase sihlangabezane nazo kulo mdlalo," kusho u-Appollis.

NGABADLALI beBafana; u-Oswin Appollis, uNkosinathi Sibisi noThapelo Morena bezilolonga. 

ISITHOMBE NGABE: BACKPAGEPIX

Inkulumo ka-Appollis yenanelwe nanguKhuliso Mudau oyisitobha seBafana.
Ubalule ukubaluleka kokulwela ibheji lesizwe, kwazise babhekene neqembu eliyingozi.