Umnyango nohlelo lokuphenya omasipala abathathu abasolwa  ngenkohlakalo

Sekunesikhathi eside kukhalwa ngokungenzi kahle kwabo

NGUMFU Thulasizwe Buthelezi, onguNgqongqoshe wezokuBusa ngokuBambisana nezoMdabu KwaZulu-Natal. 

Isithombe ngu: John Hlongwa

Thandoluhle Ngubo

UNQUME ukubafaka ngaphansi kwabaphenyi omasipala abathathu okuyiMsunduzi, iKwaDukuza noNongoma, osekunesikhathi eside kuvela izikhalo zokungaphathwa kwabo ngendlela nangokungenzi kahle kwabo, uNgqongqoshe wezokuBusa ngokuBambisana nezoMdabu KwaZulu-Natal, uMfu Thulasizwe Buthelezi.

UButhelezi umemezele lokhu izolo ngoLwesine kwisigcawu nabezindaba ebesisemahhovisi omnyango wakhe eMayville, eThekwini, lapho ebeyokhuluma okokuqala ngombiko wakamu-va kamcwaningimabhuku, othinta omasipala besifundazwe. NgoLwesine owedlule ihhovisi likamcwaningimabhuku lakhipha lo mbiko oveza isimo sezimali nokusebenza kwazo komasipala bakulesi sifundazwe, phambi kwekomidi lalo mnyango esishayamthetho.

Umbiko uthi komasipala abawu-54, bawu-7 kuphela abathole ucwaningomabhuku oluhlanzekile, olungenagcobho, abawu-37 bathola imibiko ehlanzekile, kodwa enogcobho. Ekhuluma uButhelezi, uthi lesi sinyathelo asithathayo singesinye seziphakamiso eziphakanyiswe ngumncwaningimabhuku.

"Ngiqoke ukusebenzisa isigatshana somthetho womasipala i-106, esithi ungqongqoshe wohulumeni basekhaya unelungelo lokufaka abaphenyi komasipala uma kuvela izinsolo zenkohlakalo, ukungaphathwa kahle kwemali nanoma yiziphi ezinye izinsolo zokungenzi kahle. Sekukaniningi ke sithola izikhalo ngokwenzeka kulabo masipala abathathu.

"Uphenyo lwethu luzogxila ezingxenyeni zokuxhashazwa kwempahla kamasipala, ukugxambukela kosopolitiki ezindabeni zokusebenza kukamasipala nokukhishwa kwamathenda, ukuqashwa kwezisebenzi ezingenazo izicucu zemfundo ezifanele, ukusetshenziswa kwemali yezidingo zompha-kathi kumaholo ezisebenzi, nokunye okuningi," kusho uButhelezi.

Uthi lesi sinyathelo silandela uphenyo oseluphothuliwe komasipala ababili ababesolwa ngokufanayo, okuwuMasipala wesiFunda uThukela nowaseNdumeni. Uthi uphenyo luveze ukuthi oThukela bekuxhashazwa kakhulu imali yomkhandlu, okugcine kulimaza izinhlelo zokuthuthukiswa kwemiphakathi.

ENdumeni kuvele eyokuphuma kwamathenda, ikakhulukazi awonogada ngendlela okungeyo-na njengoba engaveli amarekhodi alo elandela uhlelo olujwayelekile lokufaka isicelo sethenda. UButhelezi uthi izikhulu zalabo masipala zizothathelwa izinyathelo ezinqala.

Uthi umnyango uzoqhubeka nemizamo yokuqinisekisa ukuthi bonke omasipala besifundazwe bathola ucwaningomabhuku oluhlanzekile, nezidingo zemiphakathi zihanjiswe.