NGUNkk Ntombifuthi Masinga oyisikhulu sakwa-IEC KwaZulu-Natal, oncome ukubekezelelana kwamaqembu ezombusazwe.

Belunokuthula ukhetho lokuchibiyela

Phumlani Gama

IBONGE abalandeli bayo nokwethenjwa yizakhamizi ezifundazweni ezahlukene inqoba ukhetho lokuchibiyela i-ANC. Elakuleli belibambe ukhetho lokuchibiyela emawadini ayisithupha. Leli qembu lidle umhlanganiso kuwadi 12 kuMasipala wasoPhongolo, KwaZulu-Natal.

Lenze okufanayo nakuwadi 13 kuMasipala iChris Hani, e-Eastern Cape laphinde ladla umhlanganiso kuwadi 9 kuMasipala iVhembe eLimpopo. I-MK Party yenze obekulindelwe ngabaningi KwaZulu-Natal inqoba u-ward 28 KwaDukuza, eStanger. Bekulindelekile ukuba leli qembu lilunqobe lolu khetho kulandela ukunyathela komholi walo, uMnu Jacob Zuma ozifikele yena ezogayela iqembu lakhe ivoti.

I-DA inqobe umjaho wesikhundla sobukhansela kuwadi 99 kuMasipala waseGauteng, iJohannesburg. Leli qembu licazelana ngamandla nePA kaMnu Gayton McKenzie enqobe uwadi 82 khona eJohannesburg.
Okhulumela i-ANC KwaZulu-Natal, uMnu Fanle Sibisi, uthe iqembu libonga emalungwini alo nabavoti.

"Okwenzekile ikakhulukazi oPhongolo, kuyinkomba yokuthi abantu basakudinga ukuholwa wuKhongo-lose. NaKwaDukuza siyayemukela imiphumela yakhona. Ngesikhathi kukhankaswa, sifikile kubantu. Sikuzwile abakukhulumayo. Sizokwenza konke abakukhulume nathi," kusho uSibisi.

UNkk Ntombifuthi Masinga oyisikhulu sakwa-IEC KwaZulu-Natal, uncome ukubekezelelana kwamaqembu ezombusazwe.
"Ukhetho beluluhle lunokuthula. Siyinhlangano sithokoziswe wukwenyuka kwesibalo sabavoti abaphume ngobuningi babo bayobamba iqhaza okhethweni lwasoPhongolo naKwaDukuza," kusho uNkk Masinga.