Ikhale kwezwakala inkakha yomlingisi uNandi Nyembe

Lo makadebona uthi yize abacela ukunikelelwa  njengoNgxoli (Brenda) besizwa  kodwa yena ucela umsebenzi...

UNgqongqoshe wezeMidlalo, ubuCiko namaSiko, uMnu Gayton McKenzie ushaye kwelakhe iphakethe wanikela

NGUMAKADEBONA kwezokulingisa uNandi Nyembe.

Thandi Zondi

IZWELE kwabaningi i-video esabalale ezinkundleni zokuxhumana yenkakha ekulingiseni uNandi Nyembe (74), ecela umsebenzi esikhundleni sokunikelelwa. Lokhu kugcine sekuholela ekutheni uNgqongqoshe wezeMidlalo, ubuCiko namaSiko, uMnu Gayton McKenzie nezakhamizi zaseNingizimu Afrika ukuba zingenelele ngokuphosa esivivaneni, kufakwa imali kwi-akhawunti yalo mlingisi.

Imali izofakwa ngqo kwi-akhawunti kaMama uNandi Nyembe, kanti ungqongqoshe uthe le mali kayiveli emnyangweni wakhe, yiphakethe lakhe.

Lo makadebona womlingisi uzakhele igama ebonakala emidlalweni okubalwa kuyo othi, Isithembiso, iYizo Yizo, i-The Queen, iZone 14, iHouse of Zwide, Isono, Isibaya neminye eminingi, kanti kumanje ubonakala kwi-Adulting.

Ekhuluma kwi-video uthe: "Kunzima kulo mkhakha, sengiyezwa ngempela ukuthi sengisezingeni lokuthi ngicele banginikelele, angilona lolo hlobo lomuntu. Angithandi abantu ukuba bangidabukele, ngoba ngiyakwazi ukuzenzela," kuchaza yena.

"Ngiyabona oNgxoli (Brenda) bakwazile ukuthola imali ebantwini ngoba babenesibindi sokukhuluma ngesimo sabo, mina angikho esimweni esithile, ngidinga umsebenzi. Uma ngihleli akusho ukuthi umqondo wami kawusebenzi," echaza ukuthi udinga umsebenzi kuphela ngoba umqondo usaphila, ngamadolo kuphela ayinkinga.

Nakuba esesebenzisa isihlalo esinamasondo (wheelchair) ngenxa yobudala, uthi usakwazi ukusebenza.

"Bengenza i-Adulting ngijika nayo iwheelchair, angizibekile phansi. Ungacabangi ukuthi sekuphelile ngami uma ngihleli kulesi situlo," esho.

Abantu bababaze ubunzima bokuba semkhakheni wezokulingisa njengoba phambilini bekhona nabanye abalingisi abaveze ubunzima babo, okubalwa kubo uBrenda Ngxoli owagcina ehlanganiselwe umnikelo ka-R100 000 wathola namatoho.

Ngonyaka owedlule uGcina Mkhize owayelingisa kwiSibaya wayekhala ngokuthi ukhishwa emzini wakhe, naye wahlanganiselwa imali engaphezudlwana kuka-R20 000. Umlingisi uCarlos Radebe owazakhela igama kwiBackstage, uVusi Thanda owayelingisa eMzini Wezinsizwa bangabanye esingababalula abaphumele obala bacela usizo.