Iyaqina eyoqhekeko kubasunguli beJoyous Celebration

NGABASUNGULI beJous Celebration, nguLindelani Mkhize, nguMthunzi Namba noJabu Hlongwane.

Lucky Cain

LUYAQHUBEKA nokuhlala obala kuhle kwezinqa zesele uqhekeko kubasunguli beqembu lodumo iJoyous Celebration, njengoba beqhubeka nokungabonakali emicimbini yaleli qembu abanye babo.

Njengamanje iJoyous Celebration iphezu kwezinhlelo zedili lomcimbi womculo wayo elizoba seThekwini ngempelasonto yePhasika mhla ka-19 no-20 ku-Ephreli.

Leli phephandaba lihoshe umoya wokuthi ukunyamalala eqenjini kwabanye babasunguli beJoyous, okunguMthunzi Namba noJabu Hlongwane, kudalwa wukungagculiseki ngendlela leli qembu eseliholwa ngayo njengoba sekuhlale kubonakala uLindelani Mkhize kuphela kubasunguli baleli qembu.

Umthombo ongaphakathi kuleli qembu uthi nakuwona lo mcimbi omkhulu ongempelasonto yePhasika bazobe bengekho bobabili laba, nakuba bengabasunguli baleli qembu.

NgoMgqibelo mhla ka-19 iJoyous kulindeleke ukuba ikhumbuze abalandeli bayo izingoma zayo zamzukwana, bese kuthi ngomhla ka-20 icule izingoma zayo ezintsha, iphelezelwa ngabaculi asebedumile.

Lo mthombo uthe nakuba leli qembu lizonandisa izinsuku ezimbili kodwa uzobe engabonwa nangalukhalo uMthunzi osekuphele iminyaka engaphezulu kwemihlanu engaculi naleli qembu, noJabu osekuphele cishe emibili.

"Okudumazayo wukuthi laba bazobonakala benandisa emcimbini wePre Easter Gospel Festival ezoba ngempelasonto eyandulela iPhasika. UJabu noMthunzi bangabanye babaculi abazocula kulo mcimbi kodwa abekho kwiJoyous," kusho lo mthombo.

Uthe sekunesikhathi kulokhu kukukhulunywa ngalolu qhekeko lwabasunguli njengoba isikhathi esiningi sekuhlale kubonakala uMkhize kuphela ehola leli qembu.

IJoyous ingelinye lamaqembu angaconsi phansi kubathandi bomculo wokholo njengoba amathikithi emicimbi yayo evamise ukuthengwa ubuthaphuthaphu aphele, uma izonandisa.

UMkhize ukuchithile ukuthi kunoqhekeko olukhona kubasunguli beJoyous. Echaza ngokungabonwa kozakwabo kuleli qembu uthe kudalwa wukuthi bamatasa nezinye izinto ezithinta ezamabhizinisi abo, futhi bangabafundisi abahola amabandla, okwenza babe bhizi.

Uthe nakuba bengabonakali becula naleli qembu kodwa lokho akusho ukuthi kabaseyona ingxenye yabasunguli baleli qembu.

"Bangabasunguli beJoyous, lokho ngeke kushintshe noma ngabe bayabonakala becula noma bengekho," kusho uMkhize.

Mayelana nomcimbi wePhasika uMkhize uthe ngeke akwazi ukuqinisekisa ukuthi bazoba khona noma cha laba baculi.

UMthunzi unxuse ukuba kuthintwe uJabu ngalolu daba kwazise nguyena okhulumela iqembu. UJabu akatholakalanga ocingweni lwakhe.