UNyazi lubusise iKaizer Chiefs

YINKOSI  uMduduzi "Nyazilwezulu"  Shembe obusise iKaizer Chiefs.

Phumlani Gama

KUSOLWA indlala yezicoco njengembangela eholele ekutheni umqondisi wekomidi elibhekelele ukusebenza kweKaizer Chiefs, uKaizer Motaung Junior, ahole ithimba lezikhulu nezisebenzi zale kilabhu, bayocela izibusiso kumholi webandla lamaNazaretha ohlangothini lwaseBuhleni, iNkosi Mduduzi 'Nyazilwezulu' Shembe.

NGUKAIZER Junior Motaung obehambisana neziphathimandla zeKaizer Chiefs, beyocela izibusiso ebandleni lamaNazaretha ohlangothini lwaseBuhleni.

ILANGA Lempelasonto lithole ukuthi uMotaung nezinye izikhulu zale kilabhu babe nomhlangano ovalelekile noNyazi ngezithuba zakusihlwa ngoMsombuluko.

Sekuphele iminyaka eyishumi Amakhosi ehlaselwe yinkemane yokungabikho kwezicoco. Umthombo osondelene nalolu daba, uthi lezi ziphathimandla zifike ekomkhulu laleli bandla eNanda, eThekwini ngenhloso yokukhulekela izibusiso.

"Ufike ehamba nezinye izikhulu bezocela ukubusiswa kwekilabhu yakubo," kusho umthombo.

UMnu Thokozani Mncwabe okhulumela ibandla lamaNazaretha eBuhleni, ukuqinisekisile ukufika kwethimba leZimpofana.

"UNyazi lufana nolwandle. Lwamukela wonke umuntu. Lubusisa wonke umuntu ofika ezocela isibusiso. Nokho-ke ngiyafisa ukuba ngikucacise ukuthi nakuba lubusisa uNyazi, kodwa kuyaye kube kulowo obusiswayo ukuthi unomsamo omuhle kangakanani, kanjalo nedlozi lakhe.

"Nabo laba abafikile kuzoya ngokuthi umsamo wabo uqondile yini," kusho uMncwabe.

Amakhosi ahambele eBuhleni nje, ngeSonto azoba nomdlalo obalulekile njengoba kulindeleke ukuba atholane phezulu neMamelodi Sundowns emdlalweni owandulela owamanqamu weNedbank Cup, okuyisicoco sokugcina asethembele kusona kule sizini. Lo mdlalo
uzoqala ngo-18h00 eLoftus Stadium.

Leli phephandaba  lixhumane noMnu Vina Maphosa okhulumela Amakhosi, okuqinisekisile ukuthi izikhulu zaleli qembu bezivakashele uNyazi, kodwa wathi ukuvakasha kwazo akuhlangene neqembu, bekuwuhambo lwazo lwangasese.